✅ უწყებათაშორისი საბჭოს გადაწყვეტილებით, 1-ლი ივნისიდან, სახმელეთო საზღვრები გაიხსნა. სახმელეთო საზღვრის კვეთა, ამ ეტაპისთვის, შესაძლებელია ევროკავშირის წევრი ქვეყნების და მათზე დამატებით 40 ქვეყნის მოქალაქეებისა და ბინადრობის (ცხოვრების) უფლების მქონე პირებისათვის. მათ სასაზღვრო გამშვებ პუნქტზე უნდა წარადგინონ ვაქცინის სრული კურსის დამადასტურებელი დოკუმენტი და ბოლო 72 საათში ჩატარებული PCR ტესტის ნეგატიური პასუხი; ან წარადგინონ საქართველოში ვიზიტამდე ბოლო 72 საათში ჩატარებული PCR ტესტის ნეგატიური პასუხის დამადასტურებელი დოკუმენტი, ხოლო საზღვრის კვეთიდან მე-3 დღეს უნდა ჩაიტარონ PCR კვლევა, საკუთარი ხარჯებით.

PCR რეჟიმით შემოსვლის შემთხვევაში სავალდებულოა ელექტრონული აპლიკაციის შევსება, რომელიც განთავსებულია stopcov.ge-ზე:  https://registration.gov.ge/pub/form/8_protocol_for_arrivals_in_georgia/tk6157/

✅ ქვეყანაში შემოსვლისას, უცხო ქვეყნის მოქალაქეებზე, რომლებსაც გადატანილი აქვთ COVID-19 და არიან ერთჯერადად ვაქცინირებულები, საზღვრის კვეთისას გავრცელდება იგივე რეგულაცია, რაც 2 დოზით აცრილ პირებზე.

✅ 30 ივნისის 23:00 საათიდან გადაადგილებაზე შეზღუდვა აღარ მოქმედებს.

✅ პირბადის ტარება სავალდებულოა როგორც ღია, ისე დახურულ სივრცეებში.

✅ კვლავ ძალაშია შეზღუდვა ფართომასშტაბიანი გასართობი და ისეთი სოციალური ღონისძიებების გამართვასთან დაკავშირებით, როგორიცაა, ქორწილი, ქელეხი, ბანკეტი, სხვადასხვა სახის იუბილე და სხვ. მსგავსი ღონისძიებების მასპინძლობისთვის კვების ობიექტებს თუ სხვადასხვა სარიტუალო დარბაზებს პირველ ჯერზე დაეკისრებათ ფინანსური სანქცია 10 ათასი ლარის ოდენობით, ხოლო მსგავსი ქმედების განმეორებით განხორციელების შემთხვევაში, აღნიშნული ობიექტები დაილუქება.

✅ კვლავ აკრძალულია ღამის კლუბების ფუნქციონირება როგორც ღია, ისე დახურულ სივრცეებში.

✅ „იზოლაციისა და კარანტინის წესების დამტკიცების შესახებ“ საქართველოს მთავრობის 2020 წლის 23 მაისის №322 დადგენილებაში ცვლილებები შევიდა, რომლის თანახმად, 19 ივლისიდან ტრენინგებზე, კონფერენციებსა და სემინარებზე მონაწილეთა დასწრება დასაშვები იქნება მხოლოდ 72 საათით ადრე PCR ტესტის ან 24 საათით ადრე სწრაფი ანტიგენის ტესტით ტესტირების საფუძველზე ან/და სწრაფი ანტიგენის ტესტის გარეშე სრული ვაქცინაციიდან 14 დღის შემდეგ.

აღნიშნულ კატეგორიას ემატებიან ის პირები, რომლებსაც ბოლო 6 თვის განმავლობაში გადატანილი აქვთ COVID-19. აღნიშნული 6 თვე აითვლება კორონავირუსის ლაბორატორიულად დადასტურებული შემთხვევიდან 14 დღის შემდეგ. 

გარდა ამისა, სტუდენტები, რომლებიც მედიცინის საგანმანათლებლო პროგრამების პრაქტიკულ ნაწილს გადიან არადისტანციურად, მოეთხოვებათ, წარადგინონ ვაქცინაციის დამადასტურებელი ცნობა ან კვირაში ერთხელ საკუთარი ხარჯით ჩატარებული PCR ტესტის უარყოფითი პასუხი ან 6 თვის მანძილზე კორონავირუსის გადატანის დამადასტურებელი ცნობა. 

ასევე, იკრძალება ბანაკის ტიპის შეკრებები, მათი ორგანიზაციული ფორმისა და ჩატარების ადგილის მიუხედავად;

✅ 14 აგვისტოდან 13 სექტემბრამდე იმოქმედებს შემდეგი შეზღუდვები:

• სრულად იზღუდება ფესტივალები, გასართობი ღონისძიებები და კონცერტები. ხოლო, სხვადასხვა სპორტული შეჯიბრებების გამართვა შესაძლებელი იქნება მაყურებლის გარეშე, თუმცა ყველა მონაწილე უნდა იყოს ვაქცინირებული (მეორე დოზიდან გასული უნდა იყოს 14 დღე) ან უნდა ჰქონდეს ბოლო 72 საათში ჩატარებული PCR ტესტის ან ბოლო 24 საათის განმავლობაში ჩატარებული ანტიგენის ტესტის ნეგატიური პასუხი. 

• იზღუდება ბავშვთა გასართობი ცენტრების მუშაობა;

• კვების ობიექტების მუშაობა, ნაცვლად ღამის 23:00 საათისა, დასაშვები იქნება 22:00 საათამდე;

*საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მიმართავს საბჭო კერძო დამსაქმებლებს.

✅ სასწავლო პროცესი სკოლებში 15 სექტემბრიდან 4 ოქტომბრამდე დისტანციურ რეჟიმში განახლდება, ანალოგიური რეგულაცია გავრცელდება უმაღლეს და პროფესიულ სასწავლებლებზე.

4 ოქტომბერიდან იმუშავებს დიფერენცირებული მიდგომა, რაც გულისხმობს, რომ ქალაქში ან სოფელში, სადაც ინფიცირების მაჩვენებელი 4%-ზე ქვემოთ იქნება, სწავლა განახლდება დასწრებულ ფორმატში, ხოლო იმ ქალაქებში და სოფლებში, სადაც 4%-ზე მაღალი იქნება მაჩვენებელი, სწავლა კვლავ დისტანციურ ფორმატში გაგრძელდება.

✅ 4 ოქტომბრამდე შეზღუდული დარჩება სააღმზრდელო დაწესებულებების მუშაობა. ეს ეხება როგორც სახელმწიფო, ასევე კერძო ბაღებს. 

✅ უწყებათაშორისი საკოორდინაციო საბჭო კიდევ ერთხელ მიმართავს მოქალაქეებს, დაიცვან მოქმედი რეგულაციები, დახურულ სივრცეში ატარონ პირბადე და დაიცვან სოციალური დისტანცია, რაც, ვაქცინაციასთან ერთად, ვირუსის გავრცელების პრევენციისთვის კვლავ უმნიშვნელოვანეს ღონისძიებებად რჩება.

აღნიშნული რეგულაციების აღსრულება მკაცრად გაკონტროლდება.